‘मेरी मामु’को शिर्ष गीत रिलिज- ‘आमा’को महत्व खोज्दै आयुव (भिडियोसहित)

काठमाडौं । निर्माता तथा कलाकार सन्तोष सेनको आगामी फिल्म ‘मेरी मामु’ को शिर्ष गीत सार्वजनिक भएको छ । काठमाडौंमा पत्रकार सम्मेलन गर्दै फिल्मका निर्माण पक्षले ‘आमा’ बोलको गीत सार्वजनिक गरेको हो । सार्वजनिक गरिएको ‘आमा’ गीतमा रवी मल्लको शब्द, कल्यान सिंहको संगीत तथा रोहित जोन क्षेत्रीको आवाज रहेको छ ।

गीतको भिडियोमा फिल्मका मुख्य कलाकार आयुव सेन र सारुक ताम्राकारले फिचरिङ गरेका छन्, जहाँ आफुलाई जन्मदिने आमाको महत्वलाई प्रस्तुत गरिएको छ । कक्षा तीनमा पढ्दै गरेका बाल कलाकार आयुव सेनले गीतमा आफ्नो भुमिकालाई न्याय गरेका छन् ।

‘प्रेमगीत’ र प्रेमगीत २’ को अपार सफलता पश्चात आसुसेन फिल्मसले फरक धारमा पनि फिल्म बनाउनुपर्छ भन्ने उदेश्यका साथ ‘मेरी मामु’ निर्माण गरिएको निर्माता सेनले बताएका छन् । यो फिल्मलाई काठमाडौं, नौबिसे, दामन, हेटौंडा र चितवनका विभिन्न ठाउँहरुमा छायाङ्कन गरिएको छ ।

आगामी भदौ १५ गतेबाट दर्शकमाझ रिलिजमा आउँदै गरेको यो फिल्मलाई यम थापाले निर्देशन गरेका हुन् । फिल्मको कथा लेखन पनि निर्देशक थापाको आफ्नै रहेको छ । फिल्मको शीर्ष गीत सार्वजनिक कार्यक्रममा उपस्थित निर्देशक थापाले ‘मेरी मामु’ले आमा छोराको सम्बन्धलाई पर्दामा प्रस्तुत गर्ने बताउँदै भने, ‘आमाले आफ्नो छोरालाई आँगनमा रोपिएको तुलसीको बोटमा पानी हाल्नु भन्दा नमान्ने छोराले आफ्नो आमाको मृत्युपछि सँधै ती तुलसीको बोटमा पानी लगाउँछन् । यसै सेरोफेरोमा ‘मेरी मामु’ बनेको छ ।’

यो फिल्ममा सात वर्षीय आयुव सेन, सारुक ताम्राकार, प्रेमगीत २ फेम अभिनेत्री अस्लेशा ठकुरी, कुसुम गुरुङ, दुर्गा मल्ल लगाएतको मुख्य भुमिका रहेको छ । साथै फिल्ममा कलाकार भुवन चन्द पनि विषेश भुमिकामा देखिने छन् । कार्यक्रममा फिल्मका मुख्य कलाकार आयुव सेन, सारुक ताम्राकार, अस्लेसा ठकुरी, कुसुम गुरुङ, लगाएत निर्माण टिम उपस्थित थिए ।

यो फिल्मलाई पुरुषेत्तम प्रधान र मानकृष्ण महर्जनले खिचेका हुन् । बनिष शाह र भुपेन्द्र अधिकारीको सम्पादन रहनेछ । फिल्ममा समावेश गीतहरुलाई गोपाल रसाईली र संजिव बराईलीको एरेञ्जमा अन्जु पन्त, प्रताप दास, रोहित जोन क्षेत्री, त्रिशाला गुरुङ र बादल थापाले स्वरबद्ध गरेका गरेका छन्
फिल्मको मुख्य सहायक निर्देशकको रुपमा ललित विष्ट र सहायक निर्देशकको रुपमा किरण आचार्य, दिपान्कर रत्नशाक्य, राकेश दाहाल र विनय पौडेल रहेका छन् ।

फिल्मको कार्यकारी निर्माताको रुपमा रेशम जंग शाह रहेका छन् । फिल्मलाई सन्तोष सेनले प्रस्तुत गरेका हुन् ।